KUNDI A LAMALIZA BIASHARA LEO TUSKER CHALLENGE

Shangwe hizi zitaendelea kwa Uganda leo?

Na Mahmoud Zubeiry, Kampala

MECHI za Kundi A, Kombe la Mataifa ya Afrika Mashariki na Kati, CECAFA Tusker Challenge zinatarajiwa kufikia tamati leo kwenye Uwanja wa Mandela, Namboole mjini hapa.

Wenyeji na mabingwa watetezi, Uganda The Cranes wanatarajiwa kumaliza na Sudan Kusini, mchezo ambao utaanza saa 12:00 jioni, kabla ya hapo, kuanzia saa 10:00 jioni, Kenya Harambee Stars wataonyeshana kazi na Ethiopia.

Uganda wanaongoza Kundi A kwa pointi zao sita, wakifuatiwa na Ethiopia na Kenya, ambao kila mmoja ana pointi tatu. Sudan Kusini hawana pointi hata moja.

Ikumbukwe timu mbili za juu kutoka kila kundi, A, B na C zitafuzu moja kwa moja Robo Fainali, wakati kutoka makundi yote matatu, watatafutwa washindi wa tatu bora wawili, kukamilisha idadi ya timu za kucheza Nane Bora.

Kwa sababu hiyo, pamoja na kwamba Sudan Kusini wamepoteza mechi zote mbili za mwanzo, bado wanaweza kupigana kiume japo kugombea kupenya kama miongoni mwa washindi wa tatu bora.

Kenya na Ethiopia bila shaka patachimbika leo- kwani timu zote zimefungwa na Uganda na zote zimeifunga Sudan Kusini- sasa leo itakuwa siku ya kujua nani nafuu kati yao.

Mechi nyingine za kukamilisha hatua ya makundi ya michuano hii, zitachezwa zote kesho za Kundi B na C.

MSIMAMO KUNDI A:

P W D L GF GA GD Pts

Uganda 2 2 0 0 2 0 2 6

Kenya 2 1 0 1 2 1 1 3

Ethiopia 2 1 0 1 1 1 0 3

Sudan Kusini 2 0 0 2 0 3 -3 0

MSIMAMO KUNDI B:

P W D L GF GA GD Pts

Burundi 2 2 0 0 6 1 5 6

Tanzania 2 1 0 1 2 1 1 3

Sudan 2 1 0 1 1 2 -1 3